Pasaia Lezo Lizeoa

LH6 mailako lau gelek, urrian zehar, hiruna egun pasa dituzte Arantzako aterpetxean, bi txandatan. Arantza Bortzirietako herri euskaldun txiki bat da, eta egonaldi honek euskaraz hiru egun bizitzeko aukera aparta eskaini die. Bertan, San Juanxar bisitatu, mendian ibili, zuhaitz parkean tirolinan gozatu, jolasak egin... eta herrian bizi direnen artean ibili ziren. Benetan egonaldi ederra izan da Arantzakoa.

Ikusi hemen irteera hartako zenbait argazki.

Orereta ikastolako lagunek plan polita antolatu dute Añabitarten duten baserrian. Hain zuzen ere, Mari Domingi ezagutu eta harekin egoteko aukera eskainiko dute. Datorren urtean antolatuko duten KILOMETROAK jaiaren lehen ekimena dute hauxe. Sarrerak erosi nahi badituzu egin klik HEMEN.

Ikusi bideo honetan egin diguten proposamena:

EUSKARALDIAhasi aurretik lanketa berezia egin dugu gure komunitateko bi ataletan. Batetik, autobus zerbitzuko langileak, eta bestetik, aurten EUSKARALDIAn lehen aldiz parte-hartu ahal izango duten 16 urteko gazteak (BATX 1).

Pasaia-Lezo Lizeoko Orientazio Departamentuak antolatuta Jose Luis Gonzalo haur psikologian aditua izan dugu bisitan. Bina saio egin ditu Lehen Hezkuntzako irakasle guztiekin, haurren garapen emozionala gai zutela.

Pantailak Euskaraz ekimenak bultzatu duen PANTAILALDIAn (izena eman hemen) parte-hartzeko gonbita egin nahi dizuegu hemendik. EUSKARALDIAren atarian, astebetez, etxeko pantailetan euskarazko produktuak kontsumitu edo/eta sortzeko ekimena, hain zuzen ere.

Lizeoko 205 neska-mutiko ariko dira ikasturte honetan Eskola Kirolean, 127 mutil eta 78 neska. Lehen Hezkuntzako 3, 4, 5 eta 6 mailakoek parte-hartzen dute egitasmo honetan, astean hirutan kirol saio eginda. Hogeita lau talde sortu ditugu, hamabi talde benjamin mailakoak eta beste horrenbeste alebin mailakoak. Hamabi begirale eta koordinatzaile bat ariko dira neska-mutilekin batetik bestera kirol desberdinak probatzen. Eutsi berdeak!

Ikasturte berri honetan ere Pasaiako Udalak sustatzen duen ESKUBIDEAN programaren parte izango gara. Hasteko, LH5etik DBH4ra arteko ordezkariak aukeratzen aritu gara. Pasa den ostegunean, berriz, gela bakoitzetik aukeratutako ordezkariek lehen hartu-emana egin zuten Udaleko bi teknikarirekin: Eli eta Ibai. (Argazkietan, LH5ekoekin eta LH6koekin egin zuten saioa).

ESKUBIDEAN haurren eta nerabeen parte hartzea sustatzeko programa bat da, udalak adingabeen beharrak eta nahiak ezagutu eta erabakietan parte hartzaile aktibo izatea bilatzen duena.

Jolasean harrapatu ditugu LH6koak, baina ez dira ohi bezala jolas librea ari. Irakasle bihurtu dira, LH3koen irakasle, hain zuzen ere. Euskaraz jolastu ahal izateko baliabideak eskaintzea dugu helburu. Azken egunetan LH6koak hiru jolas berreskuratzen aritu dira gerora hirugarren mailakoei jolas horiek erakusteko: Anbo-ato, Kokodrilo-kokodrilo eta Urtarrilean jaio dena. Begira argazki hauetan zein ongi pasa duten denek.