Pasaia Lezo Lizeoa

Eskubidean, Pasaiako Haur eta Nerabeen eskubideak bermatzeko planaren baitan, Lehen Hezkuntzako 5. mailako ikasleek bisita egin dute Pasaiako Udaleko Zerbitzuen pabiloira, Udalaren funtzionamenduz gehiago jakiteko asmoarekin. Han, zerbitzuetako buruarekin eta bertako langileekin bildu dira eta batetik bestera ibiltzeko aukera izan dute. Argiteria, ur hornidura, aroztegia, garbiketa, hilerria, lorezaintza... denetik ikusi dute eta, gainera, zenbait makinen funtzionamendua probatzeko aukera ere izan dute.

Lehen Hezkuntzako seigarren mailako ikasleek Esti Vivancok idatzi eta Joseba Larratxe Josevisky marrazkilariak ilustratutako Argixorgin irakurri eta landu dute ikasgelan. Azkeneko Euskadi Literatura Sariaren garaile izan den ilustratzaile irundarrak badaki Lizeora arteko bidea, urtero etortzen baita marrazketari buruzko sekretuak kontatzera. Ikasturte honetan ere bertan izan dugu, Donibaneko Ubera liburutegian elkartu da gure ikasleekin, Argixorgin aitzakia hartuta. Ikasleek primeran pasa dute Joseviskyrekin.

Lehen Hezkuntzako seigarren mailako lau geletako ikasleek bizikletan ibiltzen trebatzeko saioak egin dituzte Trintxerpen. Gipuzkoako Txirrindularitza Federazioko teknikariek zenbait jolasen bitartez bizikletan ibiltzeko trebetasuna lantzen aritu dira. Saio hauek egiteko txirrindularitza federazioaz gain Pasaiako Udalak ere bere laguntza eskaini digu, gainera, Club Atletiko Trintxerpeko Josetxo Maneiroren laguntza ere izan dugu, hark utzi eta prestatu dizkigu saio hauek egiteko behar ziren bizikletak.

Eguerdietako ekintzen artean antzerkia egiten duten LH 6. mailako ikasleek jazarpenaren gaia landu dute antzezlan batean. Prestatutako lana ikaskideen aurrean antzeztu dute eta jarraian, ikaskideekin,  solasaldi bat antolatu dute dute jazarpenaz, bazterketaz eta bullying-az aritzeko.

Zazpigarren Ikastolen Batzarrari begira Lizeoan saioa egingo dugu apirilaren 11n, ostegunez, eraikin nagusiko liburutegian. 17:30ean, langile, guraso zein bazkide laguntzaileak gaude deituta.

Bilera honetan, batzar orokorrari begira, hiru txosten izango ditugu eztabaidagai: NONDIK GATOZ, NON GAUDE eta NORA GOAZ. 

VII. Ikastolen Batzar Orokorra, berriz, ekainaren 22an egingo da eta han Ikastolen mugimendua osatzen dugun zazpi probintzietako 114 ikastolok datozen zortzi urteetarako ildo estrategikoak adostea da asmoa. 

Ipar Euskal Herriko ikasleen eskubideen alde, Azterketak Euskaraz kolektiboari babesa eskaintzeko, Lizeoan lehen aldiz, Lehen Hezkuntzako 3. mailatik Batxilergoko 2. maila arteko ikasle eta irakasle guztiak elkartu gara Goiko Pistan. Ia 1.000 lagun. Argazki ikusgarria!

Seaskako lagunek Baxoa eta Brebeta azterketak euskaraz egin ahal izatea aldarrikatzen jarraituko dugu.

Lesoinuk (Lezoko aste pedagogiko musikala) eskaintzen duen kontzertu pedagogikoetako batean egon gara LH1eko ikasleak, Gezalan. Bertan eskusoinua, klarinetea, tronpeta eta hainbat instrumentu ezagutzeko eta entzuteko aukera izan dugu.

Larunbata iluntzean iritsiko da KORRIKA Pasaiara eta Lezora. Ohi bezala, Lizeoko komunitateak lau lekutan hartuko du lekukoa. Aurten, jangelako eta garbiketako taldeek, DBHko euskara taldeko neska-mutilek eta Errota Lezoko Guraso taldekoek eramango dute euskararen lekukoa, harro.

Hemen lekuak eta gutxi gorabeherako ordutegia.

Animatu eta parte hartu!